HUMANİTAR FƏNLƏR KAFEDRASI

1. Kafedranın yaranması və fəaliyyət dövrü

“Humanitar fənlər” kafedrası qeyri-ixtisas kafedrası olmasına baxmayaraq Mingəçevir Politexnik İnstitutunun əsas tədris-elmi struktur bölmələrindən biri olub, tədris, metodiki və elmi-tədqiqat işlərinin aparılmasını və tələbələr arasında tərbiyəvi məsələləri həyata keçirib. Burada müəllimlərlə yanaşı tələbələrin də elmi-tədqiqat işləri aparmasına şərait yaradılır. Tədris prosesini kafedranın yüksək ixtisaslı, peşəkar və elmi dərəcəli əməkdaşları təmin edib.

Yarandığı gündən kafedranın adı və tərkibi dəfələrlə dəyişsə də funksiyaları dəyişməmiş, fəaliyyəti müddətində səmərəli elmi-tədqiqat işlərinin yerinə yetirilməsinə nail olmuş, dərslərin yüksək elmi-nəzəri və metodiki səviyyədə aparılmasını təmin etmişdir.

Kafedraya müxtəlif illərdə professor Nazim Əhmədov, dosent Saleh İbrahimov rəhbərlik edib. 2006-cı ildən kafedraya siyasi elmlər üzrə fəlsəfə doktoru, dosent Esmira Hilal qızı Cəfərova rəhbərlik edir.

Azərbaycan Respublikası Prezidentinin müvafiq sərəncamı ilə Mingəçevir Politexnik İnstitutunun bazasında Mingəçevir Dövlət Universitetinin yaradılması ilə əlaqədar olaraq, yenidən formalaşan “Humanitar fənlər” kafedrası, universitetin rektorunun müvafiq əmri ilə fəaliyyətini davam etdirir.

“Humanitar fənlər” kafedrasının əməkdaşları həm universitetin, həm də şəhərin ictimai-siyasi həyatında fəal iştirak edirlər. Hazırda kafedrada 5 nəfər dosent, 2 nəfər fəlsəfə doktoru, baş müəllim, 1 nəfər fəlsəfə doktoru, müəllim, 5 nəfər baş müəllim, 13 nəfər müəllim və 2 nəfər laborant çalışır. Kafedranın müəllimlərindən 3 nəfəri AMEA-nın müxtəlif institutlarında dissertant kimi elmi-tədqiqat işlərini davam etdirirlər.

Kafedrada 2016-2020-ci illər üçün “Qloballaşan dünya və Azərbaycan” elmi-tədqiqat işinin problemlərinin araşdırılması planlaşdırılmışdır.

2. İxtisas haqqında 

Kafedrada bakalavr səviyyəsi üzrə 050101 Azərbaycan dili və ədəbiyyatı müəllimliyi və magistr təhsil səviyyəsi üzrə 060101 Azərbaycan dili və ədəbiyyatı müəllimliyi ixtisasları üzrə və 050113 Tarix müəllimliyi ixtisası üzrə Azərbaycan  Respublikası Nazirlər Kabinetinin 12 yanvar 2009-cu il tarixli 08 saylı qərarı ilə təsdiq edilmiş ixtisaslar (əlavə və dəyişikliklər nəzərə alınmaqla) fəaliyyət göstərir.

3. Rəhbərlik (kafedra müdiri haqqında qısa məlumat) 

Cəfərova Esmira Hilal qızı 1956-cı ildə Ağdaş şəhərində anadan olmuşdur. 1972-ci ildə Mingəçevir şəhər 10 saylı orta məktəbi bitirmiş və V.İ.Lenin adına Azərbaycan Dövlət Pedaqoji İnstitutuna (indiki Azərbaycan Dövlət Pedaqoji Universiteti) daxil olmuşdur. İnstitutda təhsil aldığı illərdə eyni zamanda Ali Komsomol məktəbini bitirmişdir. 1977-ci ildə institutu bitirib Mingəçevir şəhər 2 saylı orta məktəbdə fizika müəllimi kimi fəaliyyətə başlamışdır. Komsomol işinə irəli çəkilmiş və 1977-81-ci illərdə Toxuculuq Kombinatının komsomol komitəsinin katibi, 1982-ci ildən isə Mingəçevir şəhər Komsomol Komitəsinin I katibi vəzifəsində çalışmışdır. 1989-cu ildə Azərbaycan Kommunist Partiyası Mingəçevir şəhər Komitəsinə Təşkilat şöbəsinin müdir müavini vəzifəsinə təyin edilmiş, az sonra şəhər Partiya Komitəsinin katibi seçilmişdir.

1985-ci ildə şəhər Xalq Deputatları Sovetinin deputatı, 1990-cı ildə isə deputat, eyni zamanda  şəhər sovetinin sədr müavini vəzifəsinə seçilmişdir.

1996-cı ildə sovetlərin fəaliyyətinə xitam verildiyi üçün Şəhər İcra Hakimiyyətinə işə köçürülmüş, lakin tezliklə Mingəçevir Politexnik İnstitutuna  baş müəllim kimi daimi işə keçmiş, pedaqoji və elmi fəaliyyətə başlamışdır. 2002-ci ildə Azərbaycan Respublikasının Prezidenti yanında Dövlət İdarəçilik Akademiyasında “Demokratiyaya keçid dövründə liderlik: sosial-siyasi təhlil” mövzusunda  namizədlik dissertasiyası müdafiə edərək siyasi elmlər üzrə fəlsəfə doktoru elmi dərəcəsinə, 2008-ci ildə isə Azərbaycan Respublikasının Prezidenti yanında Ali Attestasiya Komissiyasının qərarı ilə dosent elmi adına layiq görülmüşdür.

2006-cı ildən hazırkı dövrə qədər Mingəçevir Dövlət Universitetində “Humanitar fənlər” kafedrasının müdiri vəzifəsində çalışır.

1994-cü ildən Yeni Azərbaycan Partiyasının üzvüdür.

1988-ci ildə Azərbaycan SSR Ali Soveti Rəyasət Heyətinin Fəxri Fərmanı ilə, 2012-ci ildə isə Azərbaycan Respublikası Təhsil Nazirliyinin Fəxri Fərmanı ilə təltif edilmişdir. 

3  kitab və 34 elmi məqalənin müəllifidir.

Ailəlidir. 3 övladı, 3 nəvəsi var. 

4. Tədris olunan əsas fənlər

5. Çap olunmuş vəsaitlər haqqında (dərslik, dərs vəsaiti)

1. Cəfərova E.H. Hakimiyyət və liderlik institutu. Siyasət, Bakı, 1999, 51 səh.

2. Cəfərova E.H. Siyasi hakimiyyət və demokratiya. Səda, Mingəçevir, 2008, 84 səh.

3. Hacıyev A.N., Cəfərova E.H., Məmmədov İ.M. Multikulturalizmə giriş. Mütərcim, Bakı, 2018, 372 səh.

4. Məmmədova R. Azərbaycan dilində nitqin formaları (psixoloji-linqvistik əsaslar). Elm və təhsil. Bakı, 2017, 140 səh.

6. Kafedra əməkdaşları haqqında məlumat